Profesoresha e Departamentit të Gjuhës Angleze: Përkthim dhe Interpretim, të Fakultetit të Filologjisë, Prof.Ass.Dr. Mejreme Ymeri, ka qëndruar për një javë në Universitetin e Salentos në Itali, në kuadër të projekteve të mobilitetit të programit ERASMUS+. Gjatë vizitës, ajo mbajti ligjërata në Universitetin e Salentos, në qytetet Lecce dhe Brindisi, ku ndau njohuritë e saj lidhur me rëndësinë e gjuhës angleze në vend dhe rajon, rolin e kinemasë në përmirësimin e aftësive gjuhësore, si dhe trendet e zhvillimit të përdorimit të gjuhëve të huaja në Kosovë.

Gjatë qëndrimit në Itali, profesoresha Ymeri pati mundësinë të shkëmbejë njohuri dhe përvoja me kolegët e saj në universitetin nikoqir, duke theksuar se ky mobilitet ka ndikuar në zgjerimin e rrjetit të saj për bashkëpunime profesionale dhe ka kontribuar në zhvillimin e mëtejshëm të eksperiencës së saj akademike. Profesoresha Ymeri u prit nga stafi i Universitetit të Salentos, përfshirë profesorin Thomas Wulstan Christiansen, si dhe nga Zyra për Bashkëpunim Ndërkombëtar e këtij universiteti.

Ky projekt mobiliteti është një mundësi e shkëlqyer për forcimin e lidhjeve ndërkombëtare dhe zhvillimin e bashkëpunimeve akademike ndërmjet institucioneve të arsimit të lartë.