Përfaqësues të Fakultetit të Filologjisë zhvilluan një takim pune me përfaqësues të Bibliotekës Kombëtare të Kosovës “Pjetër Bogdani”, me synim zgjerimin e bashkëpunimit ndërinstitucional dhe identifikimin e mundësive të reja për realizimin e aktiviteteve të përbashkëta në fushën akademike, kulturore dhe shkencore.

Gjatë takimit u diskutuan forma konkrete të bashkëpunimit që do të kontribuojnë në pasurimin e jetës akademike të studentëve dhe në promovimin e aktiviteteve me interes të përbashkët. Në këtë kuadër, u shqyrtuan mundësitë për organizimin e konferencave, promovimeve të botimeve, aktiviteteve kulturore dhe nismave të tjera që mbështesin zhvillimin e arsimit dhe kërkimit shkencor.

Palët vlerësuan rëndësinë e bashkëpunimit ndërmjet institucioneve të arsimit të lartë dhe atyre të kulturës, duke theksuar se partneritete të tilla krijojnë mundësi të reja për zhvillimin profesional të studentëve dhe për fuqizimin e veprimtarisë akademike.

Në përfundim të takimit, u shpreh gatishmëria e ndërsjellë për ta thelluar këtë bashkëpunim dhe për ta konkretizuar atë përmes projekteve dhe aktiviteteve të përbashkëta në të ardhmen.