Programi njëvjeçar i Masterit në Studime Letrare, i ofruar nga Dega e Gjuhës dhe Letërsisë Angleze, është krijuar për ata që kanë pasion për letërsinë dhe dëshirë për t'u angazhuar në mënyrë kritike dhe krijuese me tekste, kultura dhe ide. Duke ofruar një mundësi unike për të eksploruar interesimet individuale të kërkimit, ky program u mundëson studentëve të përshtatin rrugëtimin e tyre akademik, sipas kurreshtjes së tyre intelektuale dhe aspiratave profesionale. Me një planprogram që kombinon thellësinë teorike, gjerësinë historike dhe fleksibilitetin ndërdisiplinor, studentëve u jepet mundësia të planifikojnë rrugët e tyre akademike, të mbështetur nga ekspertë të njësisë akademike dhe të pasuruar nga një komunitet studiuesish entuziastë.

Programi është i strukturuar rreth shtatë lëndëve bazë për t’u përgatitur për tezën e masterit, të përfunduara të gjitha në dy semestra. Këto lëndë bazë prezantojnë orientimet kryesore kërkimore në fushën e studimeve letrare: teori dhe kritikë letrare dhe histori kulturore. Krahas lëndëve bazë, studentët do të zgjedhin një lëndë zgjedhore dhe do të marrin pjesë në orë ushtrimesh, çdo semestër. Këta elementë u mundësojnë studentëve të thellojnë njohuritë e tyre dhe të përsosin aftësitë metodologjike në fushat që u interesojnë. Në semestrin e fundit, studentët do të përfundojnë tezën e masterit, duke kryer një hulumtim të thellë mbi një problem specifik në studimet letrare dhe duke vendosur zgjidhjen e tyre të propozuar, brenda kornizave teorike aktuale.

Rezultatet e synuara të të nxënit të programit Master në Studime Letrare përputhen në mënyrë të përpiktë me qëllimet dhe objektivat e përgjithshme të programit të studimit, duke siguruar një përvojë arsimore kohezive dhe të orientuar drejt një qëllimi të qartë. Çdo rezultat i të nxënit është krijuar për të mbështetur drejtpërdrejt objektivat kryesore të programit, duke përfshirë zhvillimin e aftësive të avancuara të të menduarit kritik, kuptimshmëri të thellë të teorive letrare dhe aftësi në metodologjitë e kërkimit që lidhen me studimet letrare. Ky përafrim garanton që aftësitë, njohuritë dhe kompetencat që studentët fitojnë përmes programit, reflektojnë plotësisht dhe mbështesin qëllimet e tij themelore. Rrjedhimisht, kjo lidhje midis qëllimeve dhe rezultateve të të nxënit përforcon integritetin, koherencën dhe rëndësinë e programit, duke përgatitur përfundimisht të diplomuarit për kontribute domethënëse në arsim, kërkime shkencore dhe më gjerë.

Me përfundimin e programit, studentët do të arrijnë rezultatet e mëposhtme të të nxënit:

Hulumtim dhe Njohuri: Studentët do të fitojnë aftësi të avancuara kërkimore, të nevojshme për kryerjen e punës së pavarur shkencore në studimet letrare. Ata do të jenë të aftë në gjetjen, vlerësimin dhe sintetizimin e burimeve parësore dhe dytësore si dhe në formulimin e hulumtimeve kërkimore origjinale.

Mendim kritik dhe aftësi interpretimi: Të diplomuarit do të zhvillojnë kuptimshmëri të nuancuar të teksteve letrare, duke demonstruar aftësinë për t'i interpretuar ato brenda kornizave më të gjera kulturore dhe teorike. Ata do të angazhohen në mënyrë kritike me traditat e ndryshme letrare, duke shqyrtuar çështje të përfaqësimit, identitetit, etikës, ideologjisë, dinamikës së pushtetit dhe formave estetike.

Komunikim profesional: Studentët do të rrisin aftësinë e tyre për të komunikuar në mënyrë efektive rreth teksteve dhe ideve letrare, si me gojë ashtu edhe me shkrim. Ata do të jenë në gjendje të shkruajnë ese, të bëjnë prezantime dhe analiza kritike të qarta e të mirëstrukturuara, të përshtatshme për audiencën akademike dhe profesionale.

Ndërgjegjësim kulturor dhe global: Programi do të nxisë ndërgjegjësimin e studentëve për traditat letrare globale dhe ndërlidhjen e letërsisë në mes të kulturave dhe gjuhëve. Të diplomuarit do të vlerësojnë shumëllojshmërinë e shprehjeve letrare dhe do të kuptojnë rolin e letërsisë në formësimin e identiteteve kulturore dhe vlerave shoqërore.

Praktikë Etike dhe Reflektive: Të diplomuarit do të angazhohen në përsiatje etike mbi studimin dhe praktikën letrare. Ata do të demonstrojnë ndërgjegjësimin për çështjet etike në kërkimin dhe shkrimin letrar, duke përfshirë çështjet e përfaqësimit, pronës intelektuale dhe ndjeshmërisë kulturore.

Përgatitje për studime të mëtejshme dhe karrierë: Programi do t'i përgatisë studentët për studime të mëtejshme akademike në nivelin e doktoraturës nëse dëshirojnë, ose për karrierë në fusha të tilla si arsim, shtëpi botuese, institucione kulturore, gazetari dhe administrime artistike.

UDHËZUES PËR STUDIME Programi Master në Studime Letrare (2025 - 2028)